多數聽勸隊友留隊，好少會叫隊友離隊。不過，巴西右閘丹尼爾竟然話為咗保羅戴巴拿著想，叫佢最好離開祖雲達斯去第二度發展。

保羅戴巴拿因為今屆歐聯賽事表現突出，被外界捧上天，甚至有「新美斯」稱號，家陣身價可能已經高達8,000幾萬歐元，亦同巴塞隆拿及皇家馬德里扯上關係。

丹尼爾最近接受巴西媒體訪問時，就話戴巴拿總有一日應該離開祖記：「我哋都傾過幾次。我同佢講，我唔肯定會係幾時，但佢一定要離開祖雲達斯，先可以再進步。」

戴巴拿喺2015年夏天由巴勒莫加盟祖記，替祖記奪得兩季意甲錦標，同埋助球隊殺入今屆歐聯決賽。