香港藝人北上搵食賺人仔，要付出嘅代價好大，例如，言論自由（你［你懂的），有時又會收唔到錢，被「當眾帶走」亦不是新聞。之前蔡少芬試過，最近仲有陳冠希眾目睽睽下，被公安夾走。而另一個問題係，依家大陸幾乎每日有幾十部電影及電視作品出產，不過礙於港澳演藝人北上發展有特定配額，致不少本港藝人喪失演出機會。

依家香港一班藝人就成立咗個叫做「香港演藝界內地發展協進會」（簡稱：演藝內協會），今日喺會展舉行成立典禮。呢個協會，獲「強力部門」支持——中港兩地政府部門、演藝院校代表、電影電視發展公司等派代表出席支持，特首林鄭月娥仲特別拍咗條片，讚揚香港演藝界人才輩出、聲影視作品成績理想。

林鄭在片中強調，要「深化」香港同大陸合作，政府認為「演藝內協會」喺呢個時間成立係合適嘅時機，林鄭明言：「期望好快有一個日子可以與協進會各位朋友，坐低傾吓香港演藝事業發展嘅大計。」

「演藝內協會」執行會長曾志偉及副會長汪明荃喺上台表示會藉此機會向特首反映香港演藝界訴求。其實佢哋喺條片裡面都講得好清楚，就係要團結北上搵食嘅香港藝人。阿倫話：「有時候收唔到錢，一啲人就俾人蝦，申冤無路訴。」阿姐就話：「其實我哋已經上咗去好多次，同佢哋反映，我覺得首先就要解決呢個『國民待遇』問題。」阿姐真係識講嘢，香港人竟然可以變成「國民」，咁淘寶順豐郵費係咪可以同大陸劃一？

唱歌成日甩嘴嘅阿倫，都記唔到自己個會全名，不斷NG，由「香港演義界內地發展」、「香港演藝界內地協會」、「香港演藝界內地發展協進會」都有……

演藝內協會副會長汪明荃致辭時，稱國家主席習近平於《十九大報告》內提到，大陸與香港、澳門發展發展緊密相連，將全面推進大陸同港、澳互利合作。

而香港演藝界藝人決定集合眾人之力，成立「演藝內協會」，創會成員包括成龍、汪明荃、譚詠麟、曾志偉、莫華倫、黃英豪、古天樂、劉偉強、王祖藍、謝霆鋒、吳傑莊及張劍，希望成為大陸與港澳間橋樑嘅角色，促進三地演藝界專業交流，包括場地交流、增加港澳藝人去大陸參與製作機會、加強兩地藝人在職培訓、送藝人去大陸一啲學院進修；演藝內協會將於香港、北京及橫店設置設聯絡辦公室。

協進會最新核心成員名單：

會長 成龍 全國政協委員 香港演藝人協會前會長
副會長 汪明荃 八和會館主席
副會長 譚詠麟 香港演藝人協會前會長
執行會長 曾志偉 廣州政協委員 香港演藝人協會前會長
創會成員 莫華倫 香港歌劇院藝術總監
創會成員 黃英豪 全國政協委員
創會成員 古天樂 香港演藝人協會會長
創會成員 劉偉強 香港電影導演會會長
創會成員 吳傑莊 全國政協委員
創會成員 王祖藍 廣西壯族自治區政協委員
創會成員 謝霆鋒 PO朝霆創辦人