立法會選舉殺到，唔少打算參選嘅人趁提名期前，爭相賣廣告，以免計入選舉經費，打算出選嘅工聯會王國興同郭偉強，最近出咗張疑似「大愛」海報，由王國興凝望住抱BB嘅郭偉強，聲稱爭取男士7天侍產假，海報俾人改圖變成工聯會支持「同性婚姻合法化」。不過，無論同志平權，又或者7天男士侍產假，工聯會都係冇投票支持，一張海報盡顯工聯會選舉前講一套、唔使選又做另一套嘅典型手法。

14年議案 冇投票支持

八方一見到王國興含情脈脈望住郭偉強抱BB嘅海報，真係以為工聯會走在平權最前線，原來海報本身係寫「向全薪七天邁進」，爭取男士7天侍產假，但標語俾人改圖變成「支持多元成家」、「同性婚姻合法化」，有網民話睇落似「老少hehe配」。
俾人話同郭偉強hehe，王國興話網民創意無限：「都幾搞笑，幾有創意，估唔到會有咁評論。」佢自言不介意，認為反而引起討論，多人關注，都係好事，但重申工聯會不支持同性婚姻，又話呢張海報係同事設計，郭偉強懷中嘅仔仔， 真係郭嘅仔仔嚟㗎。
而為正視聽，八方搵番工聯會喺2014年男士7天侍產假嘅議案、甚至同志平權點投票，結果可能會令大家好失望。由陳志全提出嘅同志平權，工聯會投棄權票；由民主派提出嘅男士7天侍產假議案，工聯會坐喺度唔投票，讓議案遭否決，當年工聯會解釋，如果7天侍產假議案獲通過，政府會撤回議案，連現時3日嘅侍產假都冇埋喎。

各黨派對7天侍產假投票立場

反對：民建聯、自由黨、經民聯
出席但不投票：工聯會王國興、郭偉強、陳婉嫻、黃國健、麥美娟、鄧家彪、勞聯潘兆平
支持：工黨、民主黨、公民黨、新同盟、街工
資料來源：立法會

李八方
mailto:[email protected]