香港人普遍唔like政黨，睇吓中大香港亞太研究所最新調查就一清二楚。話說中大喺上月11至24日訪問806位市民，了解佢哋對政黨嘅觀感，評分最高嘅竟然係出世冇耐嘅新民黨，有47.9分，高過得47分同46.6分嘅民主黨同民建聯。新民黨咁勁，研究估計同佢哋反外傭居港同民意貼近有關。但就算喺咁多政黨中最高分，又如何？事關都係唔過50分嘅合格水平，全部肥佬收場。
同一調查都發現，雖然新民黨評分最高，但最高支持度嘅政黨，卻係民建聯，有11.1%、民主黨同公民黨各以9.7%及4.1%緊隨其後，關鍵係62%受訪者話唔支持任何一個政黨，所有政黨都要檢討吓喇。