民主派前立法會議員譚香文今日晨早8點已到特首辦門外排隊，準備喺娥特出席行會時遞交請願信，要求政府喺觀塘綫鑽石山站，興建無障礙升降機由地面直達售票大堂，可惜娥特現身時，用咗唔夠3秒接咗譚香文封信，就快閃將封信交畀助手離開。

但當娥特見到同場另一名前立法會議員、工聯會鄧家彪，同該會現任議員麥美娟示威時，娥特就熱情上前同兩人握手，再停步做工聯會「佈景版」，攞住該會要求改善基層醫療的請願信合照，驟眼睇似乎真係親疏有別。

點知娥特呢頭配合工聯會做完請願騷，嗰頭入返特首辦後，即被記者問到點睇工聯會會長吳秋北近日批評法官的言論，娥特回應時就揸正嚟做，表明自己無分政治立場，總之就不能接受有人因不滿法庭裁決從而詆毀法官，不點名對吳秋北言論表示「遺憾」，唔知工聯會中人對娥特今朝忽冷忽熱的舉動有乜感受？