當年今日
關於我們

【李八方online】官員答質詢揼波鐘 李慧琼都鬧爆

蘋果日報 2018/12/12 14:35

李慧琼陳健波聶德權財委會楊偉雄

近年官員喺立法會嘅答問水平強差人意,就連財委會主席陳健波都要趁行政長官質詢時間,直接向特首投訴有關情況。不過,議員鬧完一輪之後,官員嘅表現似乎都無咩改善,立法會代主席李慧琼今日喺立法會完成口頭質詢程序嗰時,就提醒官員回應時要盡量簡短,因為部分質詢只有3至4個議員可以提問。
立法會今日一如以往進行6條口頭質詢,其中第5條係針對環聯資訊有限公司網站被揭發有嚴重資訊保安漏洞,令市民信貸紀錄被公開嘅問題,單係主體回應連埋補充回應提問人謝偉俊嘅追問,負責回應嘅政制及內地事務局局長聶德權就用咗10分鐘有多,佔22分鐘質詢時間近一半,其後只有張國鈞、陳振英同莫乃光3個議員可以提問。
而之後有關投資與發展人才質詢情況亦不相伯仲,創新及科技局局長楊偉雄用大量時間回應主體答案,之後只有廖長江、潘兆平等人可以追問,當時其實仲有3個議員正排隊發言。楊偉雄完成發言之後,作為代主席嘅李慧琼都不禁皺咗一下眉頭,更提醒官員回應時要盡量簡短,點名話第5、6條質詢只能夠有3至4個議員可以做補充質詢咁話。
其實官員答問表現差,時有所聞,所以財務委員會主席陳健波早前都特意去政總開班,教官員點去立法會回應議員提問,但事實證明情況似乎無咩改善,唔知波哥見到依個情況,會唔會都覺得早知慳番啖氣好過呢?
empty
政制及內地事務局局長聶德權。王心義攝