日本「Yahoo!搜尋大獎2018」今日於東京舉行，公佈今年嘅人氣搜尋。今年出道嘅尊尼組合King & Prince獲得搜尋大獎，同埋成為偶像組別冠軍，成為兩冠王。其餘關於娛樂嘅人氣搜尋人物，仲有木村拓哉細女光希，成為搜尋率最多嘅模特兒，光希今年出道受到全亞洲關注，更獲著名品牌起用為代言人，成為最強星二代。

中村倫也同今田美櫻係人氣搜尋男、女藝人，人氣搜尋歌手係已經引退嘅安室奈美惠。最多人搜尋嘅日劇係晨早劇《一半，藍色。》，電影就係荷李活片《大娛樂家》（The Greatest Showman）。今年成為《蠟筆小新》小新第二代配音員嘅聲優小林由美子，就係最人氣搜尋聲優，佢上台領獎時小新都有現身支持。

精選娛聞，喺晒《娛果》
http://fb.com/appledailyent