江海迦（AGA）出道5年，雖然產量唔算多，但係大部分嘅作品都出自自己手筆，如果形容佢係唱作實力女歌手，相信無乜人有異議。成功非僥倖，AGA透露自己寫咗超過200首歌，但係推出嘅只有20首：「好多人話我有才華，其實我都係靠勤力。」

明年2月，AGA將舉行主題為「Night with AGA」嘅MOOV LIVE演唱會，自言係夜間創作人嘅佢，好想藉住音樂會同樂迷分享自己嘅創作心情：「日頭好忙，要應付好多嘢，夜晚就會沖杯expresso，狗狗會入嚟陪住我，然後天馬行空咁寫歌。」

成長，令人對同樣嘅事睇法會改變，AGA都唔例外：「聽番自己啲demo會發現，好似愛情觀咁。細個會因為好小事而感動、好青澀，依家覺得女性要擔當好多唔同嘅角色，社會畀咗好多定義。好似女仔選擇唔結婚、唔生仔，社會會畀壓力，其實選擇單身、愛自己都可以好開心。」

3年前，AGA嘅姐姐離世，佢坦言一直無好好處理嘅情緒：「當時無處理到，係今年先學識點樣尋找快樂，我睇書、聽講座了解何謂快樂。呢件事（姐姐離世）會一直喺生命入面，以前姐姐去過嘅地方，我會去返，好想尋找佢嘅影子。以前有佢，我好受保護，依家我可以更成熟去明白佢嘅諗法，好多謝佢喺呢27年做我最好嘅朋友。」

AGA話姐姐嘅離世，令佢更加重視家人，就算得2日假期，都會同父母去短途旅行：「當你知道生命可以啪一聲無咗，就會學識每日都同人講我愛你，呢幾年，媽咪畀好多正能量我，大家每日都通電話。」

至於愛情，AGA都好希望遇到對的人，但現時單身嘅佢選擇儲起啲愛先：「依家會揀工作先，無諗過去到咩年紀就想自己有個家，工作同結婚可以一齊嘅，但依家我更加要時間去做創作。好多人話我有才華，其實我寫咗超過200首歌，推出嘅只係20首，其餘嗰啲未夠，未係時候。我都好想去紅館，不過呢啲好睇緣份，好似愛情咁，等我再寫多啲歌，有多啲人支持，我就會爭取。」機會，從來都係留畀有準備嘅人，AGA一直都好努力裝備自己，相信紅館夢，不遠矣。

髮型：Gary Sun Of Hair Corner
化妝： Vanessa Wong