台慶頒獎禮已經曲終人散，所有獎項都已經塵埃落定，但係唔少網民都對於賽果有爭議！好似一直被視為頂頭大熱嘅宣萱，最後竟然失落視后，輸咗俾同劇嘅唐詩詠。女配角方面，更加跌到一地眼鏡碎，今屆得主唔係《同盟》嘅姚子羚，亦都唔係從後趕上嘅「大小姐」林淑敏，而係來自江蘇、《超時空男臣》嘅朱晨麗。

查實喺宣佈得獎一刻，朱晨麗都一臉茫然、成個人震晒行上台，好似唔知道發生乜嘢事，到咗講得獎感受嘅時候，先係講自己喺入行嗰陣，受到唔少打擊，之後仲因為廣東話講得唔好，成為佢拍劇嘅障礙，好彩有珍姐鼓勵先有番啲信心，點知佢講講吓，無端端走去話：「希望我哋喺內地成長嘅小朋友，嚟到香港之後依然可以打出一片天，一齊支持我哋！」

呢句唔講由自可，一講即刻俾網民瘋狂洗版，最初個個都只係話戥大小姐唔抵，點解個獎唔係頒俾佢，有啲人仲話連佢套劇睇都未睇過，之後講有人留言話聽完朱晨麗講完之後真嚇咗一跳，覺得成番說話好礙耳，甚至有人覺得佢好幼稚，冇理由喺呢啲場合講呢啲說話。

失落女配角嘅林淑敏，佢喺頒獎嘅前夕話過：「o依家得到嘅嘢，已經得遠超過當日我祈禱希望得到嘅嘢，所以每樣嘢好足夠，對我嚟講係多咗。」(新聞連結： http://bit.ly/2DvfatG )佢嘅好拍擋許家傑就送花同喺ig留言話：「雖然你攞唔倒女配角，但你嘅表現毋庸置疑，在我心中你已經是最佳女主角。」

精選娛聞，喺晒《娛果》
http://fb.com/appledailyent