近日唔少中環人講緊嘅，唔係股市或世界大事，而係午飯後去游水，究竟趕唔趕得切？呢個建議係咪太無知？查實當倡議者係堅離地嘅特首梁振英，相信唔少市民都唔覺得出奇，CY若然係醒就唔會屢屢令港人激氣，而立法會嘅田氏兄弟則非常懂得政治抽水呢個遊戲，先後喺fb圖文並茂明嘲暗撐呃like！

獲封政界抽水王嘅自由黨榮譽主席田北俊前晚搶閘發功，喺fb留言：「食飽飯唔游水做乜喎？！」同時貼咗一張在水中央嘅揮手照，相上仲寫住：「攝於去年夏天，一個吃飽飯的下午」，冇指名道姓，但網民一睇就知係抽水兼抽擊梁特啦，加上hashtag「#食飽飯要抽水」，唔少網民會心微笑，有人仲話「抽乾晒，冇得游呀」。
大少成功抽水，身在北京出席兩會嘅田北辰緊接昨晨喺fb留言，話親身試試食晏游水，發現趕得切喎！二少又話：「前題（提）係，一定要游完水先好食嘢，因為食飽飯，係唔適合即刻游水。」二少再自貼露肉游水照，手揸蕉同梨，話做完運動易吸收，不宜食得太heavy，「好似我咁食生果就最慳時間又健康啦」。唔少網民對二少暗撐CY表示不滿，八方諗起，大少講過撐CY會令建制派失支持，唔知二少認唔認同？

BBC指建議遇到嘲弄

而CY呢個離地建議，連英國廣播公司（BBC）都有報道，形容佢嘅建議「遇到一些人嘲弄」，當中引述《南華早報》同《虎報》話維港水質污濁兼有菌，又有救生員講明飯後不宜游泳，估唔到連國際都咁關注呢！

李八方
mailto:[email protected]