這晚（20日）谷中跑馬冇雷神莫雷拉，卒之潘頓食尾糊下，奠定「騎師王」彩池勝局，累積36分後上擊敗只得24分的「其他騎師」選項封王。

潘頓於最尾第八場二班1200米，夥拍蘇保羅馬房「一哥」掄元，此駒今季首次報捷，單Win及組合獨贏A2分別派69及29元。潘頓個人連同第四場贏大熱「喜進」（方嘉柏馬房），成功起孖。

七歲馬「一哥」來自本港馬匹拍賣會，300萬身價唔算貴，此駒出名忠心準繩，呢次用最熟手的潘頓，從第7檔起步，沿途留在中間貼欄五、六位競跑，有遮擋冇蝕位形勢有利，結果人馬合作直路從中叠以勁勢撲上，贏0.75馬位清脆俐落。

「一哥」累積45戰得9冠6亞2季，由最初四班殺上目前102分居頂班，今場加分後評分將直逼110分大關，總獎金則升至約900萬，馬主李耀湘當初以300萬購入，可謂眼光獨到。

蘇保羅除了「一哥」外，這晚連同第六場與史卓豐合作贏「金如意」，馬房亦告季內首度起孖。

尾場二至四名順序為「軍歌」、「真先生」及「喜悅繽紛」，全屬有票數支持的正路馬，四重彩派一萬二千幾算好分。