現年42歲的阿倫,前半生一帆風順,事業愛情皆得意。他原從事紙品貿易生意,三餐不愁,並擁有一段美滿婚姻,可惜,一切在頃刻間消失。1999年8月,阿倫偕友人於廣州清遠旅遊,其間他於江河暢泳,卻因跳水生意外。
頭撞水底傷數節頸骨
「嗰日啲水好混濁,我睇唔到河底,斷估有一定水深,點知一跳落去個頭已經撞地,霎時間,我覺得手腳唔受控制,當時嘅情況幾危險,我乜都做唔到,惟有閉氣等自己慢慢浮上水面,上水嗰一剎那,我無晒氣力,最後由附近船伕合力將我救起。」阿倫向記者憶述一幕幕驚心動魄場面。
經醫生證實,阿倫頸骨第2節至第7節有骨裂情況,部份頸骨更移位,壓着神經線,需進行手術,但手術後情況沒改善,導致他四肢永久癱瘓,要在輪椅上度過餘生。
由於雙臂乏力,無法使用一般手動輪椅,要靠電動輪椅代步,那部他視為「命根」的電動輪椅數月前壞掉,令他手足無措。「部輪椅時好時壞,試過突然喺巴士上失靈,搞到我手忙腳亂,要勞煩警察搵架復康巴士送我返屋企;又試過有一次,部輪椅突然溜後兼煞唔到掣,結果將我成個人拋咗落地,跌到周身傷晒。」
阿倫曾找師傅維修輪椅,可是經檢查後,發覺機件嚴重耗損,難找適合零件維修,貧困的他,又無力負擔購買一部新電動輪椅,目前只能向志願團體暫借輪椅使用。「最唔方便係借用嘅輪椅尺寸唔啱,其次係唔可以長期借用。」