細價賭股升到開巷，北望神州，少少近磅而仲未大炒嘅有彩票股。要揀，可以揀華彩控股（8161，市值9億銀），博佢股價可以好似放紙鳶咁樣。
華彩05年改名兼變身祖國多元化彩票股。喺最慘烈嘅08年，一場金融海嘯，加埋集團大額撇減商譽，見紅9億銀。但之後華彩已經年年有錢賺，今年上半年華彩純利仲更加大幅增長咗1.4倍，到近5,000萬銀，兼貼住上年度純利6,750萬銀水位。華彩業績靚仔，但現價0.121元仲係貼住08年10月慘淡期收市價，殘到冇朋友。
踏入下半年，祖國7月彩票銷售近244億人仔，同比增加咗20%。而當中，華彩主打褔利彩票電腦銷售業務嘅廣東省，頭7個月省彩票銷售172億人仔，keep住No.1。成個彩票市場好景，加埋主打地區領導優勢，華彩肥仔水。
再講，華彩係「中福在線/VLT」獨家設備提供商，喺舊機更替潮底下，估計呢瓣設備銷量會迎來歷史新高。
同樣地，喺另一瓣體育彩票，華彩講明，打後五年將會係體育彩票終瑞機更新換代高𥧌期。食住呢潮水，華彩業績隨時喜上加喜。

唔好計多，華彩今年純利係咁意翻一番到1.35億銀，預期PE跌到得番6倍，比較華彩轉型以來最高去到54倍PE，以及平均21倍PE，平咗一大截；而華彩大股東陳城仲係主板寶威（024）嘅主席。華彩業績靚爆鏡，又有point炒升格轉主板。
呢轉買華彩，翻一番到0.24元，預期PE都係13倍，又華彩上番平均PE 21倍，要見0.38元，係講緊要升兩倍。

錢雋
細價股專家
本欄逢周二、五刊出

《亂噏24》現正逢一至五每日更新，今周嘉賓陳淑莊帶肥佬黎同蔡瀾背包旅行遊中歐，即刻收睇： http://bit.ly/appletalk24