萬梓良、白只、張繼聰同王敏奕主演、改編自余兒同名小說作品嘅電影《今晚打喪屍》，噚晚率先舉行咗幾場優先場，余兒都有去謝票，現場反應都唔錯。佢之前嘅作品小說兼漫畫作品《九龍城寨》都儲落唔少fans，所以有唔少人慕名入場支持，話晒都係第一次有作品改編成電影，作為原創作者嘅余兒應該好緊張。

唔知係咪忙謝票緊張票房反應，今日出門口余兒就撞車，佢接受電話訪問時報平安話：「唔係緊張，準備離開屋企返公司嗰陣撞咗。人冇事太太傷咗腳。今晚應該都會去首映。」佢講笑話套戲今日上，都唔算好緊張，應該係電影公司緊張多啲，話晒投資咗咁多錢，當然作為原創者都希望票房有交待。不過聽佢講架日產Cube個車頭炒到摺咗，架車應該就會報銷，不過好在人冇事。另外，今日上映嘅《今》片目前成績都唔錯，截至3點鐘票房已經有24萬元。