【爆相爆片】現年30歲的裕美去年被爆背老公暗交黃子恆，之後再爆出疑被家暴，結果與老公離婚兼跟黃子恆分手，在感情上重新出發的裕美，短短一年已有新歡上場，大前晚約11時，裕美孖米九型爆老外行銅鑼灣惠康，被讀者關先生透過《蘋果》「爆相爆片」分享又拖又攬過程。

人少即抱抱

關先生前晚接受電話訪問表示：「見到裕美拖住鬼佬好風騷咁買嘢，行到比較少人嘅位置玩抱抱，鬼佬好主動從後攬裕美，旁若無人，表現相當親密。佢哋選購咗蒸餾水、乳酪等就去埋單，由裕美負責畀錢。」記者致電裕美恭喜拍拖，她情不自禁地笑：「多謝，我哋唔係好耐咋，我諗……真係好短。」有否一個月呢？裕美說：「我諗差唔多，真係冇計住。」
裕美指兩人是朋友介紹認識，男友是意大利和英國混血，問到男友做甚麼工作？她說：「生意，關於學校嘅嘢，佢可以介紹啲好嘅學校，因為我本身都想進修英文，所以佢介紹咗英國某啲學校，網上視像學習方便啲。」
裕美好保護男友拒透露名字，對於讀者讚他靚仔，裕美甜笑說：「哈哈！佢OK啦，但樣唔係重要，最緊要人品好好，吸引我係好錫我，對我好好，好紳士，唔會花言巧語，佢見到我開心，佢就會開心。」

「錫我就足夠」

情路坎坷的裕美坦言：「講真我都拍唔少拖，以前好多人都有好浪漫嘢，好似拍戲咁，但人生唔係戲劇性，一個人錫你，對你好，我覺得咁就足夠，互相欣賞好重要。」問到有否跟男友交代離婚？裕美表示：「都有講吓以前感情狀況，但我哋唔多講以前，覺得過咗去嘅嘢就算。」
採訪：皓騫