當年今日
關於我們

【開工遇TG】歐錦棠感激觀眾對港劇期待 藉社會訊息為港人打氣

蘋果日報 2020/04/16 00:00

歐錦棠文頌嫻空手道打天下

曾幾何時,電視撈飯是 香港 人成長過程中最基本的環節,不過隨着周遭環境改變,日劇、韓劇和台劇不斷的進步,再加上港劇千篇一律的故事模式,令港劇被大幅度抛離,港劇與煲劇已經難成一體!直到近年,因為多了免費電視台的出現,吸納了一班仍然對創作有夢的人,總算激發了沉睡多年的煲劇觀眾,某程度上已經打破了慣性收視神話!
近日ViuTV播出的港劇《二月廿九》掀起一輪煲劇潮,有消息指本緊接播放林保怡監製的《嘆息橋》,殊不知突然又改播韓劇,而韓劇播完後,現由歐錦棠監製兼主演、以空手道為題材的《打天下》接棒。而今次最令觀眾感到意外,是久違幕前的文頌嫻出山力撐好友,兩人更會發展一段感情線。日前歐錦棠與文頌嫻在九龍灣接受《蘋果》專訪,今次是兩人繼2002年拍《烈火雄心II》後,相隔17年再度合作,老朋友見面當然有講不盡的話題,阿棠直認有私心:「我入行30年,咁有默契嘅拍檔不出3個,第一個梗係我老婆(萬斯敏),第二個係佢(文女),佢嗰種位置係形容唔到,係如魚得水,兩條友做乜戲都好,唔使事前分析,又或者要飲杯嘢培養吓感情,埋位就有一種好微妙嘅火花迸發出嚟,以前係,呢套更加係!」在旁的文女笑說:「呢個我都要好多謝佢,今次係佢嘅夢想,佢搵我係我嘅榮幸。」
正如文女所言,《打天下》是阿棠的夢想,在訪問期間,阿棠多次表示「好感恩」,皆因他身邊的朋友、網民,都不約而同地表示很期待這套劇,原因只有一個,因為是歐錦棠做監製:「大家不斷留言話等咗好耐,點解啲人會期待呢套戲呢?大家都未睇成品,點解會期待呢?淨係咁我已經覺得好開心,唔知係咪揀啱題材,近年香港都好少呢類型嘅劇,我只可以話唔會辜負大家嘅期望。」阿棠續說:「喺我哋嘅拍攝過程中,就係社會事件發生嗰幾個月,喺太子出面打到嘭嘭聲,我哋喺隔後幾條街拍緊戲。有一晚喺沙田射緊催淚彈,我哋就喺沙田獅子亭開工,睇到啲煙飄上嚟,嗰陣轉唔到地方,條路根本行唔到,全部都係爛磚,喺入面我哋只可以盡創作人職責,將啲社會性嘅嘢擺入去,藉住社會性,將我哋想講嘅訊息擺入去,但我哋唔會comment,只係想鼓勵大家,就算幾咁困難,都要起番身!所以呢套劇喺對白、劇情都加咗好多呢啲符號,等大家慢慢去搵。」《打天下》背後的原因亦很簡單:「今次係由一班公認失敗嘅人,用空手道去做橋樑,藉住呢樣嘢去改變自己,再喺你嘅崗位或者身份,去打出你嘅天下,每個人都可以有自己嘅天下,唔一定係要攞晒嗰片天,大家可以用自己嘅嗰片天去改變自己。」
問到阿棠自己的天又是怎樣?他淡淡地說:「講真我日常生活都好鍾意抬頭望天,對我嚟講,任何天氣都可以係好,四季嘅變化都係靚,呢個就係我睇天做人,任何嘅天都有佢靚嘅地方。喺最惡劣嘅時候,我會同自己講,雨後一定會有陽光,就算場雨有幾長,都會有停嘅一日。做人要識得點樣同個天共存,任何嘅環境都係改變唔到,共存然後等待。」不過目前的環境,可算是艱難的時候,阿棠亦說:「我覺得而家係扭轉全球人嘅生活態度,講驚啲嗰句,今次可能係人類最後 疫情 ,甚至可能係末日,你點知呀?但係咁點呀?你繼唔繼續生活落去呀?繼續做好自己嘢,繼續生存,繼續生活,你鞋口鞋面都要生活,吸啖氣,咬實個牙關行出去又係要生活,你自己揀喇!」文女還說:「而家嘅情況根本冇得你話睇唔慣,睇任何嘢都好,嘗試將自己抽出嚟,用第三者角度去睇成件事,面對一個疫情,又唔需要過度恐慌,搞到自己日又驚、夜又驚,可能過幾個月之後冇事,咁你咪攞嚟驚?但係你又唔可以過度輕鬆,過份輕鬆又會鬆懈咗,所以要喺兩者之間拎個平衡。」
empty
empty
empty
empty
empty
empty
empty