去年澳門逸園結業，600多隻格力犬分批被領養，鄭融是其中一個善心滿載的主人，她「停一停、諗一諗」，經過多月深思熟慮，決定收養其中一隻格力犬。她在該輪領養中，選擇了一頭啡色毛、像有豹紋的格力犬「誓不低頭」（比賽的名字）帶回家。經過領取證明文件及一個月的隔離程序，鄭融終於可以帶自己領養的狗出街。日前她與愛犬在公園以帶跑方式散步，一邊叫着：「Mack﹗Good Boy﹗」一邊餵愛犬吃零食作獎勵，她說：「我而家教緊佢記自己個名。」

原名為誓不低頭的Mack，現年8歲，鄭融在網上找到牠的資料，澳洲出世，曾參加180多場賽事，比賽得過冠軍，累積獎金有30多萬元。她現時仍然為Mack保留以往在狗場時用的橙色粗狗帶，她解釋：「橙色狗帶有care with dog嘅訊息，帶出街其他狗主會明白。」鄭融大讚Mack精靈又活潑，雖然長年在籠中生活，但對事物仍有好奇心，身心也健康。Mack和鄭融並非一見鍾情，鄭融說：「我心中最想領養嗰隻已經被人領養，其實同Mack溝通唔多，見到佢個名實在太威武『誓不低頭』，然後啱眼緣。」回想當日在狗場初次接觸，Mack很快已找到鄭融的步伐一起走路，互相已有感應，最終鄭融選擇牠。

鄭融經常會做動物義工，又想再養狗，得知可領養格力犬，數個月來都有仔細考慮，她說：「問自己有冇能力養、有冇時間去照顧咁大隻狗。佢好乖，而家幫手畀個家佢，試下開心同被人錫嘅生活。」養一隻老犬並不是易事，老狗年長身體健康狀況會起變化，需要更多時間和耐性照顧，相處時間未必會太長久，鄭融已做好心理準備：「有諗過呢個問題，以前養狗只係覺得得意，而家覺得係幫緊一個生命。佢唔係一件玩具，只係用來玩，要畀佢有個健康生活，覺得自己做咗一件好事。」而她養了Mack後，亦有所得着：「因為帶佢出街，自己變得多咗運動，而且見佢望住啲嘢，我又會學佢咁欣賞周圍嘅事物。」

把Mack帶回家，鄭融生活起了變化。Mack每日7時起床，鄭融會與Mack一起到公園，每日散步兩、三次：「將心比己，人喺屋企一日都覺得悶，而且佢係一隻退休嘅賽犬，都要有責任畀一個好嘅退休生活。」她做過很多資料搜集，知道格力犬長時間困籠不懂社交，稍後準備跟Mack上課，讓牠能快點融入社會。

為讓Mack生活更舒適，鄭融會親自煮健康餐，也刻意買了兩張床給牠選擇：「佢哋係唔會sit，瞓覺會兩隻手伸直趴起嚟瞓，我買咗兩張床，一張軟及一張承托力好啲，對脊骨好嘅硬床。睇吓佢後腿位，應該係以前狗場瞓帆布床磨擦得多嘅痕迹。」但也有嚴格的時候，廚房是Mack的禁地：「我唔畀佢入廚房，有次我叫佢出廚房，發現佢唔識退後行，要諗咗好耐，然後喺廚房兜咗個圈先返出去，等慢慢就摸索到。佢都唔識落樓梯，要畀佢好多鼓勵，試多幾次就會識。不過佢好乖，冇整爛嘢。」

採訪：王連連
攝錄：馮嘉銘

【編輯推介】

【邱淑貞大女】沈月倫敦時裝周舊相洗晒版 似足媽咪勁有氣質
https://bit.ly/2OnVXMY

【6月登記換票】劉德華明年2月補辦七場個唱 退票者優先購票
https://bit.ly/2uk0s1E

【接觸基層】郭富城楊千嬅走入劏房 拍片為小朋友實現夢想
https://bit.ly/2UNq2aU

【韓娛圈醜聞】鄭俊英認偷拍被拘留 蒲頭受查再向受害者道歉
https://bit.ly/2HB2F1y

【韓娛圈醜聞】涉利用賣淫名單迫使張子妍自殺 李美淑開腔指樂意再受查
https://bit.ly/2HMDGY7

《蘋果動新聞》訂閱新世代，4月開始免費訂閱，現在接受登記！
http://bit.ly/2Ja3IXw
-----------------------------
星期一至五晚上10點半
《動腦Q》Let's Q the money！
http://bit.ly/2QW8LcI