當年今日
關於我們

  吳光正阿媽九十大壽大排筵席 - 李八方

蘋果日報 2004/09/30 08:00


中央全面插手香港政改發展之後,董建華已被人廢咗武功,變咗特區嘅象徵式領袖,大事管不了,小事不願管。老董亦知大勢,23條一定不會做,總之保住呢兩年幾,希望餘下嘅日子平平穩穩,搞番掂啲經濟,少啲噓聲,就靜雞雞離場。
至於第一屆跑輸畀老董嘅已故船王包蛇女婿吳光正,韜光十年,大有捲土重來之勢。大班放料話佢會入行政會,同其他對手如唐唐、煲呔、阿瑟王、肥平以及振英哥一齊操練,實行困獸鬥,呢個消息愈聽愈堅。
一位喺當年投票畀老董嘅人士同八方講,佢識咗吳家好耐,吳光正參加特首選舉,吳老太曾經親自打電話畀佢為個仔拉票,佢本來都好想投吳一票,但係老董當時個勢好勁,冇得講。如果今次吳光正又出賽,佢就話可能要諗諗,係咪要還番個人情畀佢阿媽。聽聞吳老太冇耐前剛慶祝九十大壽,在尖沙嘴自己間酒店大排筵席,好多賓客呢。
(圖)吳光正太太係已故船王包玉剛個女,吳老太亦大有來頭。


傳真︰2623-9278
電郵︰[email protected]