「熱烈地彈琴熱烈地唱……」2年前傘運後首屆區議會選舉，不少政治素人出現令建制派措手不及，例如徐子見成功「拔根」。連任六屆的民建聯鍾樹根落選，吸引逾百人來到辦事處開香檳、放禮炮、高唱徐小鳳名曲《喜氣洋洋》「道賀」。惟現實並非童話，大結局後故事未完，徐子見先是申請辦事處碰壁，區議會內亦目睹對家如何仗着人多「夾硬嚟」。五十而知天命，他形容自己「冇時間灰心」，在有限的任期內為目標埋頭苦幹。

落選後聲稱會「繼續地區工作」的鍾樹根，徐子見卻坦然從未在區內見過對方，「真係一次都冇。」一夜成名而港人善忘，看熱鬧的人群散去，而區議員的工作着實吃力，徐更是誇張地每星期舉辦一次活動，「一般係1、2個月搞一次，我助理有時都呻幾句，叫我唔好咁痴線。」平日亦忙於解決居民疑難，全因老樹盤根的社區，原來問題留有一大堆，「例如做落先知有啲隱蔽長者，同佢哋傾計先知有好多唔同嘅問題。」

立法會通過《議事規則》修改一刻，有人嘆息甚至撰文指自己已決心移民。其實多區區議會上，非建制派亦一直處於劣勢，「坦白講，而家區議會的確係則埋一邊，建制25（席）、非建制或者民主派10席（席），有時係有機會出現唔公平嘅現象。」立場先行，非建制派的建議可以被輕易否決，「開頭係會好激氣，唔好玩啦咁樣點做到嘢？」上任後和政府部門交手，他已發現處處荒謬，例如房屋署起樓卻連在起甚麼也不告知附近居民，「我問咗一年都仲未有圖則，之前唔知政府係咁做嘢。」

議會外亦不輕鬆，例如他曾試過「banner掛咗出去就唔見咗」，直言非建制派掛出的橫額常遭惡意毀壞，部份損毀程度「直情係溶咗」，眾人在區會上要求警方嚴重執法；租用場地因不熟悉規矩被「DQ」，未來一年不准租用，「不過唔緊要，我可能就喺辦事處前面空地搞，反正呢度唔會阻到人。」面對問題他集中去想辦法解決，同時認清現實，「而家會知道有咩限制，做到幾多得幾多，一步步去解決。」

「但你話有冇一刻後悔（參選）？又真係冇喎，反而係開心……其實4年（區議會任期）改變唔到好多嘢，可能要好長好長時間先改變到少少，但我都覺得係一件好嘅事情。」徐的辦事處得來不易，鍾樹根落選後將其辦事處改以立法會議員名義租用，又加入黃定光作租用人令徐不能優先租用，徐就此事向申訴專員公署投訴；終於，房署今年10月表示會改善聯名議辦租賃安排，明年開始聯名承租人要定出主租戶及附屬租戶，如主租戶未能成功連任約滿時便要交回房署重新進行公開申請程序，總算令「永續辦事處」的荒謬局面告終。縱然問題不會朝夕間得以解決，前路難行，但總比停在原地甘心。

記者　黃翠儀