「五一」勞動節旅遊黃金周過咗，香港旅遊又靜番陣，八方噚日喺尖沙嘴文化中心廣場遇到旅發局長周梁淑怡，佢話要搞啲新意思，除咗做內地遊客外，重要諗吓計吸引啲外國高質遊客，話唔定又要搵李曾超群幫手。
周梁話，根據調查，歐美旅客對文化歷史體驗要求高，內地旅客就多數鍾意買嘢，所以旅發局下個月會搞第二階段全新嘅「Meetthepeople」（與當地人直接交流）活動。
周梁話，呢個活動喺前年年底曾經搞過一次，好受歐美旅客歡迎，其中代表作就係請到超群餅店老闆娘李曾超群親自下廚，為鬼佬遊客煮住家菜，連法國女明星蘇菲馬素夫婦都係座上客，每位只象徵式收四百大元。咁受歡迎，話唔定李太下個月會又作馮婦，再大顯身手呢！
（圖左二）周梁淑怡在文化中心廣場睇見迷你小馬，即時童心大發。


傳真︰2623-9278
電郵︰[email protected]