當年今日
關於我們

曾志豪估計「死因」與港台政治價值觀不相符:趕盡殺絕係香港而家社會特色

蘋果日報 2021/06/19 17:08

曾志豪貴花田瘋Show快活人港台

在港台任職16年的節目主持人曾志豪,一直與拍檔貴花田(陳寶玲)和程振鵬主持電台節目《瘋Show快活人》,可是他今日如常主持後,被上司知會他與貴花田被即時解僱,公務員身份的程振鵬卻可留低,《瘋Show快活人》下周一起將換新班底梁繼璋、李麗蕊和馬小強主持。曾志豪被通知後即在FB留言:「各位,我已離開了香港電台,可惜無機會正式和聽眾說再見。」香港電台發言人表示新安排為配合港台第二台成立40周年作出節目新改革。
曾志豪即日離職時更清空儲物櫃,他離開時在門外接受訪問,曾志豪講到今日被解僱情況:「今日1點,管理層叫我哋去佢間房度,將呢個消息話畀我哋聽,佢話節目下周換人,咁我身份係自僱人士,有工作就開工,解僱原因係要配合港台第二台40周年活動,推出復刻版《瘋Show快活人》,回顧返經典人物,新主持有梁繼璋、李麗蕊和馬小強。當年《瘋Show快活人》主持係梁繼璋、梁思浩同貴花田,貴花田喺度做咗26年,復刻版可以冇佢?佢同梁繼璋都算元老,冇我都心甘命抵,冇貴花田呢個理由太假喇。我哋有即時質疑,好明顯係上面嘅命令啦,所以冇辦法。第二個質疑係咁急,周五通知,我哋冇機會講bye bye,周一就嚟接更,如果係宣傳二台40年節目,都冇大規模宣傳,似落雨收柴,對新上任同事唔公平。」

死因有可疑

曾志豪也估到自己死因,「個人言論呀,我代表嘅政治價值觀同港台唔係好相符,見到電視部清算,我同佢哋有共同理念,我諗都好難接納喺呢度,有晒心理準備嘅,好多人覺得我留喺度都好出奇,過去四星期我都喺節目做咗我嘅廣播生涯回顧,都準備咗一個月,預咗會有呢件事,預佢冇機會畀我講,但今日啱啱講晒,仲播埋陳奕迅嘅《夕陽無限好》去抒發心情,可能佢有聽我做節目,畀我講埋先去炒,我覺得係我累咗貴花田,佢又冇犯任何錯,我都冇犯錯,政治上另計,佢喺節目做咗26年,好資深,係台柱靈魂,好專業,最近內部節目人員調查,佢仲係頭三名,唔會有任何原因唔畀佢做,特別係復刻版,所以我覺得係我連累佢,可能覺得我人都走咗,留低貴花田怕夜長夢多,我好抱歉,我有同老細講害咗佢,貴花田情緒尚算平靜,佢都好意外,佢冇諗過會發生喺佢身上,佢個人物品數量好多,佢今日都清唔晒,睇吓可唔可以畀佢酌情返嚟再執,有利君雅前車之鑑。」
曾志豪表示在港台留下最多除了回憶就是一些錄音片段,他未來會做媒體工作:「我有幫《蘋果》寫稿,我都好擔心佢可以頂得幾耐。」問到曾志豪日後言行可會收斂,他說:「我一向好溫和、理性,以前係咁,而家都係咁,我好少去人身攻擊,又唔會講粗口,以後都唔會好大變化,我都唔會收口,都付出咗收口代價,會如常工作。」

暗寸梁繼璋

曾志豪今日都有接受網媒訪問,他揶揄港台今次手法不近人情,有反映心虛,另一主持程振鵬是公務員身份,可以留低,曾志豪說:「不過為咗乾手淨腳,最好3個都冇得做,呢個係大刀濶斧做法。」曾志豪深知自己向來發表的都非主流政治價值,遲早都難於倖免:「趕盡殺絕係香港而家社會特色。」曾志豪日前曾在節目中提及《蘋果日報》新聞,曾志豪估計不是被炒主因:「我個人係冇迴避過用輕鬆手法喺節目講講時事,佢咁大個計劃。」對於撤換主持,曾志豪都質疑港台選人:「以往話公務員離職唔可以返去,但而家其中有一個係咁,估唔到港台已經拆牆解綁。」曾志豪暗示的人明顯是指梁繼璋,因為曾做港台任職高級節目主任的梁繼璋,2003年透過第二輪自願退休計劃離職,並獲發一筆過退休金加自願退休計劃補償金,但其後他一度重回港台以非公務員合約形式任主持而引來非議,他最後也依規則。
曾志豪承認曾在雨傘和佔中期間也有在節目中提過時事敏感話題,也有收過大量投訴,至今終於要「埋單計數」。他說:「我喺節目畀巿民嘗試用輕鬆手法去面對社會真實資訊,節目帶畀大家娛樂好重要,但要同社會環境好配合。如果自己匿入象牙塔就太離地。所以社會上大事件也是節目內的話題,甚至乎有講到移民。」
最後,曾志豪不忘對仍留在台工作的同事致謝:「多謝佢哋嘅祝福同慰問,我都想講無論佢哋留低喺港台,或繼續喺社會生活嘅人要加油,因為每一日都好多變化,同埋嚟唔切同人講bye bye,最好當每一天係last day,用呢個方式生活就冇遺憾。今天每個香港人,無論邊個崗位,都要有心理準備,而家冇如常,如果當香港係我家,而家就『家變』,變幻原是永恆。」
此外,梁繼璋下周一便要到港台開咪主持《瘋Show快活人》,今日他在D100 Radio的節目《D100上綱上線》內向聽眾講拜拜,他提到在網台做了5年節目都好開心,跟拍檔合作愉快。D100 Radio也出了通,對於主持梁繼璋今日離職,他於D100的網台節目《一個人》也會即時停止播放,該台會安排已付款訂購該節目(24季)的訂戶退款,D100亦同時安排《一個人》訂戶可轉訂24季網台其他節目(不需補差價,但沈大師講投資、羅家聰60分鐘經人論及有Q仔無窮人三個節目除外),訂戶也可打去熱線查詢。
empty
左起:程振鵬、貴花田和曾志豪主持的港台電台節目《瘋Show快活人》估唔到今日是最後開咪。(FB圖片)
empty
曾志豪疑因政見不同被港台解僱。
empty
曾志豪寄語港台同事加油。
empty
曾志豪表示一早做了心理準備要離開。
empty
梁繼璋下周一重返港台開咪,並接棒做《瘋Show快活人》主持。(資料圖片)
-----------------------------
蘋果App大升級 更簡潔更就手!了解更多立即下載體驗