「齊高歌，歌聲放今晚開心唱請鼓掌」…喜氣洋洋到，就連發哥開工都邊跳邊哼!

周潤發、郭富城同梁家輝早排開工拍新戲《寒戰2》，話晒三大影帝級人馬，喺片場鬥戲角力，不過，有發哥，又點會有冷場，發哥由第一日開工，已經好有戲，唔使埋位嗰陣，佢仲貫徹風趣友善嘅作風!

發哥日前完成晒《寒戰2》嘅戲份，難得撞番唔少老拍檔，發哥喺自己煞科當日，同其他演員逐個玩selfie，又講笑指自己好似返番去電視台嘅木人巷年代，發哥仲喺片場佢搭住家輝膊頭，邊跳邊哼小鳳姐嘅金曲《喜氣洋洋》其中一句「齊鼓掌」，心情勁靚。

發哥仲同郭富城交流健身心得，一路講一路示範運動姿勢。講到影相同行山亦係發哥至愛，發哥仲喺片場同大家分享攝影、行山心得，講講吓，發哥提議同城城、家輝影張合照，仲提供埋私伙寶麗萊菲林相機，最搞笑係佢用菲林相機影相，相要沖晒好至有得睇，但影完之後竟然教大家點用美圖修相。

梁家輝都話有10幾年冇同發哥合作，以前拍搞笑戲多，合作拍警匪鬥智，反而係第一次：「識咗發哥好多年，佢演戲自如，又識搞氣氛，要互相學習呢種工作態度；而城城演技真係突飛猛進。」城城就話：「我做足準備去同發哥、家輝合作，過程好過癮，發哥真係好nice體貼，現場個個都好開心，發嫂又成日萬歲。」