美股咁升法,港股點走,都好容易估中。今早港股若然裂口性高開,開得太高,撲落啲Call輪可能會變買貴貨,開得唔係太高,則仍然諗得過。
希望喺升市中直接由Call輪身上搵銀,唔想傷腦筋,揀恒指Call輪埋手,主角係9785、9749同9859。
上周五,新地(016)有啲嘢睇,早段個市唔係點衰之時,散落42.60元,唔見80仙,即係由前周五(46.10元)大跌3.50元(7.6%),但好快見護價盤露面,三扒兩撥,高收44元,低位回升1.40元,而且成為4大地產股中升幅最大嗰隻,升1.4%,成個單日轉向個格。
新地現價同前周五比較,仍然唔見咗2.10元,1個星期跌4日升1日,藉住美股帶動,新地今周會有報復行動,升番2.10元唔係奇事。
可博賺3成
上周五,新地Call輪9786由正股帶動,單日急升18.6%,條件與9786相若嘅9799,則只升得6.4%,呢件新證Call輪追落後,最值得買。隻輪10月到期,輪價50仙,溢價2.3%,槓桿率8.8倍(9786壽命短幾日,輪價41.5仙,溢價2.6%,槓桿率10.6倍)好夠爆炸力。
新地升番上前周五計,9799有機會上番到65仙,現價上車可博3成。
章 盛