歐洲國家盃外圍分組賽戰火重燃,意大利今晚就作客排呢組第四位嘅保加利亞;論名氣同實力,意大利都高好多,不過,呢隊名牌至今仍未搵到合適打法咁,四場小組賽都係一球上落,意大利食經驗,小勝機會幾大,先要呢場「客勝」。
另一場就跟老友荷蘭仔嘅心水,哈薩克對冰島(藍衫)嘅角球要「細」。身處彼邦嘅荷蘭仔話哈薩克出名魚腩部隊,但主場出擊都會想守好啲,務求搶分,而冰島今屆異軍突起,佢哋啲反守突擊戰術清脆利落,又有出名遠射好勁嘅基菲爾施古臣喺到,因為主要打突擊,所以角球較少,暫時咁多場小組賽,每場都拎唔多過六個,呢場開中位數9.5個,一於再追「細」!