曼聯球迷等到頸都長，終於送走咗迪馬利亞！都啱嘅，明明就係「天使」，去加盟「魔鬼」本身就格格不入。迪馬利亞今次轉會，據報曼聯就收返6,300萬歐元，賬面計都係一年蝕1,200萬歐元。不過，有報道話曼聯今次係要分返800萬歐元畀皇馬，即係加加埋埋，皇馬賣一個迪馬利亞，就收咗曼聯8,300萬歐元！

老老實實，曼聯上季咁貴買迪馬利亞返嚟，皇馬都要加條咁嘅條款，等曼聯賣人嗰時收多筆錢，都幾狠！慘得過曼聯又照簽喎。諗返都唔知係唔係皇馬同PSG夾埋嘅，前者賣個棄將都發過豬頭，後者等一年就可以平啲入貨。曼聯雖然好似畀人撳住嚟搶，但係又好似唔太志在，唔通有錢就是任性？