香港人日日都要趕deadline，有時都咪話唔攰，但當底線被觸及，有啲死線點都要趕。一場「反送中」爭議，大家都見到盲撐嘅保皇黨有幾咁可怕？咪以為立法會先係戰場，其實地區內點樣動員市民了解惡法有幾惡，都好重要，幾名上屆區選勝出嘅80後新人王都喺呢場仗瞓身迎戰，向街坊老幼反映年輕人訴求，呢班地區fighter拍片呼籲年輕同路人趕緊7月2日前做Deadline Fighter，登記做選民以便年底區選「踢走賣港保皇黨」。

近日拍攝「致香港人」真短片反擊疑似藍絲「自編自導自演」嘅公民黨鄭達鴻，上屆喺東區區選一擊即中，兩次「反送中」遊行佢都真正同市民同行。阿達話作為區議員，有責任將市民聲音傳到社區，而喺103萬同200萬+1人上街後，竟然有保皇黨議員喺區內抹黑市民「收錢」上街甚至形容係「外國勢力嘅棋子」，強調如果唔想被人抹黑，就要有更多講真話嘅議員，溫提尚未登記嘅年輕人，「7.2做返Deadline Fighter」，然後爆黎明式金句：「少一個就係少，多一個就係多」。

呢次地區動員出色之處，係用咗建制派玩法壯大反惡法聲勢，好似民協深水埗區議員楊彧就以旅遊巴接載市民過海參加集會，凝聚唔少地區力量。楊彧話政府漠視民意強推惡法，建制派壟斷下嘅區會就凡事盲撐，冇幫市民反映聲音，同時仲硬推唔少「大白象工程」。呢位老區新人王叫大家唔好低估區議員影響力，因為特首選委會中有區議會界別，隨時可以左右特首選舉大局。若果唔想將控制權拱手相讓保皇黨，佢呼籲年輕人登記做選民，高呼「踢走賣港保皇黨，一票不投送中人」。

上屆喺沙田區選跑出嘅民主黨曾素麗除咗地區動員，早前亦同黨友去到灣仔警總投訴警察喺6.12衝突中濫權；佢話區議員其實唔只專注地區事務，例如影響全港嘅「送中」惡法，佢哋可以喺地區進行宣傳同借出物資等，喺戰役中提供強力支援，佢都提到區議員喺特首選委會有議席，變相對特首都有影響力，若要守護香港，就由呢票開始嘞。

-----------------------------
七一遊行2019
主題：撤回惡法 林鄭下台
副題/口號：重啟政改 釋放所有政治犯 撤銷暴動定性 徹查612鎮壓
日期：2019年7月1日
集合時間：下午2時30分
遊行路線：銅鑼灣維園中央草坪至金鐘政府總部
主辦團體：民間人權陣線
-----------------------------
【登記做選民 7月2日截止】

網上登記：
。方法1（登入此網站 ，按步驟3分鐘完成）
。方法2（可用手機登入，在選舉事務處網頁打開REO-1表格，使用免費手機應用程式Adobe Fill & Sign打開表格，再按指示填寫資料，按儲存文件並以點擊分享，再電郵至 [email protected]）

詳情可參閱選舉事務處網頁：
https://www.reo.gov.hk/ch/voter/gcnr.htm

-----------------------------
7月4日起 《蘋果動新聞》只限升級壹會員閱覽
繼續撐蘋果！