許廷鏗(Alfred)今日到尖沙嘴出席新歌《恐怖情人》發佈會，Alfred喺活動上同歌迷玩遊戲兼獻唱新歌，並透露新歌其實係一首甜蜜情歌，取材自真人真事，佢話：「我有一對Couple朋友，其中一位不幸離開咗，佢嘅另一半一直守護喺佢身邊，仲陪佢屋企人渡過呢個難關，於是我就想送一首歌畀佢哋。」

為咗朋友，Alfred今次更親自為新歌MV執導：「我好開心MV出咗後，有啲朋友睇完都覺得好感動，唯一美中不足嘅係佢哋見到我喺MV內，着住醫生袍出場後就笑咗出嚟，我真係要考慮下次MV或者唔見自己樣。」

活動中Alfred又透露公司已經替佢入紙申請紅館檔期，佢話：「今年入紙，預計會係明年檔，但暫時仍然等緊紅館方面批。但嚟緊八月我同音樂平台會有個騷喺麥花臣場館舉行，希望當係一個預演。」

精選娛聞，喺晒《娛果》
http://fb.com/appledailyent