歷史悠久嘅婦女銀袋日，噚日又搵到莎莎郭老闆贊助，沙田馬場一片懷舊風情，班女士扮到花枝招展，依據殖民地時代嘅傳統，戴晒各式各樣靚帽出嚟亮相，熱鬧非常，正好賀一賀主席夏佳理更上層樓，進入行會。

莎莎主席郭少明好識做，請咗大紅人譚惠珠之外，重請埋另一位行會新貴梁智鴻，實行馬照跑妝照化。金刀梁好畀面，偕同太太馮令儀一齊亮相。梁太雖然比較低調，但非等閒之輩，佢係瑪麗醫院放射治療部阿頭，同泌尿專科嘅老公一樣，喺界內好有地位。
金刀梁周身刀，但有時如果有個咁嘅老公真係冇佢收。據說金刀梁早前答應做安老事務委員會主席，八方聽聞梁太已經紮紮跳，話以為佢從醫管局退落嚟，就可以安心做番醫生養吓家，等自己可以唞唞，點知話口未完，梁醫生又去幫助老人家，然後重應承埋煲呔做行會成員。
不過，做叻人嘅另一半冇法啦，只有乜都支持老公囉，於是噚日又恩恩愛愛去馬場。梁智鴻其實唔止叻，更出身醫學世家，老竇係三十年代名醫梁金齡，細佬梁智仁就係骨科醫生，有人重話佢祖宗就係「雞腳駁鴨腳」嘅著名中醫梁財順㖭；下次見到金刀梁，真係要問個明白。

金刀梁家世威威，但同另一位行會新貴、中信泰富嘅范鴻齡比，可能重差一大截。大家咪以為范鴻齡全靠有個妹叫做范椒芬，原來范家大有來頭。傳聞范鴻齡祖先係范欽，四百幾年前已經係明朝大官，擔任兵部右侍郎，因為不滿奸臣嚴嵩父子所作所為，告老還鄉，喺寧波建立中國第一藏書樓「天一閣」，並且規定後人不准分書，「天一閣」目前有藏書三十多萬本。呢段可歌可泣嘅故事，今年重拍成四十集電視劇《天一生水》㖭。
所以話，呢個世界真係卧虎藏龍。范鴻齡除咗係忠良之後，更好助學，唔聲唔聲已經捐咗千幾萬人民幣返鄉下起惠貞書院，又資助師生去外國留學。喺香港都一樣，八方位老友丘福生（丘為新聞處前助理處長，煲呔助選團成員）可以證明，皆因佢兩人同係聖芳濟書院同學，六四年畢業，母校十二月慶祝創校五十年，校友向范鴻齡打心口，佢二話不說就應承開張一百萬嘅支票過去。
班新行會成員下個月一號至宣誓效忠，一說係為要等埋羅仲榮放棄英籍。點都好，傳媒唔理得咁多，見到候任行會成員照問，肥龍亦等唔切，星期三照拋出政改方案，夏主席、金刀梁同范忠良都要齊齊護航，邊有得走雞。

傳真︰2623-9278
電郵︰[email protected]