好多人恨做華爾街嘅投資銀行家，因為人工高，但其實壓力亦好大。卡倫紐約康復中心心理學家哈里斯．斯特勞斯話：「華爾街部份高層做嘢太辛苦，搞到要食可卡因、鴉片、搖頭丸、大麻等毒品減壓，酗酒問題亦好嚴重。」
mr.noitall喺《MSN討論區》話：「我喺一間投資銀行研究部做嘢，工作時間好長；研究部輕鬆啲，但每日都做10至12個鐘，周末冇休息。不過，如果唔嫌辛苦，呢行好易發達。」
formerwaitress講：「我有朋友喺哈佛大學畢業後，去做投資銀行家，到26歲就因為份工太辛苦唔做。佢話由朝到晚都收到客戶電話，好煩。」

努力儲錢及早轉行

Pennyandpoundwise話：「我識得幾個投資銀行家，做到30幾歲就轉行。佢哋應該趁後生早啲入行，努力儲錢，幾年後咪轉搵人工少啲但輕鬆啲嘅工囉。」
紐約一家銀行負責招聘嘅經理話：「華爾街嘅公司通常會為新員工驗尿，唔係要驗佢哋有冇濫用藥物，而係睇吓佢哋有冇足夠智慧，避免俾人查出有濫用藥物。」
有精神健康專家警告，華爾街嘅公司為咗賺錢，要啲職員付出沉重嘅精神壓力，好多人淪為道友，家庭生活仲搞到一塌糊塗。