當年今日

紅衫仔周紀:澳門資金傳殺入港股

蘋果日報 2002/01/06 00:00


據衞生署話,香港近排會進入傳染病高峯期,除咗流感同麻疹之外,韋衡發覺呢排多咗好多人患嚴重失憶㖭,尤其係上個禮拜尾段勁炒民企嘅炒家,患病嘅情況更加可以話係病入膏肓。
點解韋衡會咁講?皆因今年首日港股唔單止下跌,而且重有隻歐亞農業(932)俾班「芬佬」話佢哋嘅管理層透明度唔夠高,喺外資基金盤力沽之下,重蹈格林柯爾(8056)嘅後路,被鋤低足足兩成幾,更拖累埋其他嘅民營企業㖭,結果啲民營企業嘅「旗艦」被打到沉晒。但唔夠一個禮拜,就開始有分析員出嚟為啲民營企業講番好說話,而啲民企股價被掃高咗幾個價之後,班炒家就好似食咗懵仔丸,完全唔記得之前發生乜事咁,將啲股價掃返晒上嚟。
民企隨時山雞變鳳凰
根據班行家話,國內又有筆閒錢搵緊路落嚟香港,佢哋今次嘅目標全部會落晒喺啲民企度,貪佢哋細細粒容易食之外,亦賭中國加入世貿後,海外公司要打入國內市場,有可能會搵班民企搭路,所以啲民企隨時會山雞變鳳凰。
港股上一排成個市收乾得咁緊要,除咗係啲資金要調返國內交數之外,啲行家相信係因為澳門要開放賭業,好多有心人為咗要投個賭牌,結果就有一批澳門幫嘅資金被凍結咗。不過據聞邊個有份玩已經有定局,而攞唔到牌照失望而歸嘅資金亦已經鋪咗後路殺入港股,希望可以喺另外一個「賭場」攞番個彩。由於筆錢嘅數目唔少,呢筆錢一到香港必定會有連番廝殺,各位捉開澳門路嘅朋友,記得要睇緊啲自己隻股呀!