噚晚（19號）係張敬軒紅館個唱尾場，原定今晚係冇嘉賓，但最後還是出現了……冇錯，又係BOY'Z！關智斌（Kenny）同張致恒（Steven）！晚上十一時，原本喺台下欣賞緊軒仔唱歌嘅佢哋，突然被邀請上台！

當時軒仔致詞多謝各合作單位，但講Credit之前，軒仔忽然話：「其實我前兩晚先至喺紅館見到神蹟。當BOY'Z上到嚟之後呢，我見到就連傷殘位嘅人都企晒起身，我係第一次喺紅館見到神蹟！」

之後軒仔再介紹一輪credit，講完之後，就問觀眾喇：「你哋想唔想有嘉賓呀？我就想睇下紅館點樣可以核爆！」語畢即走去台邊，邀請Kenny同Steven上嚟——留意番，軒仔係拉Kenny上台，Steven就係自己上台。

一上到台，唔使講啦，未上已經核爆咁樣樣，Steven話：「Ai，我走先喇！」軒仔轉身即追住Steven：「你唔好走呀，你好重要0架！冇你點成事，你哋係Boy'z！」明明觀眾已不停尖叫，軒仔仲嗌大家：「俾啲聲嚟聽下？！」全場嗌得更起勁。

軒仔再話：「真係唔明點解，BOY'Z同我會變成大家嘅集體回憶。我哋都唔係好老啫。」此時觀眾又再瘋狂尖叫。軒仔笑言：「其實我哋都係00後。」

軒仔又問：「大家想唔想再睇BOY'Z開演唱會呀？」全場又嗌。此時Kenny忽然嗌：「我見到老闆（楊受成）呀！老闆不停咁點頭！」大會鏡頭亦馬上pan去拎住bom bom棒企咗起身嘅楊受成身上。

「上次就嘈到聽唔到，咁今晚我哋就唱多次《死性不改》。」噢，都係唔唱《預言書》。

唱完喇，軒仔感謂：「唉，咁就已經十幾年喇。」Steven此時問：「如果我哋真係開演唱會，你嚟唔嚟做嘉賓？」軒仔話：「嚟！」再指住Kenny話：「我同佢合唱《眼紅館》都得吖！」兩人落台後，觀眾仍不斷嗌encore，軒仔笑言：「紅館嘉賓俾人嗌encore都係第一次見。我哋上次之後有溝通過，佢哋真係好快會開演唱會0架，你哋等下啦！」