啱啱過去嘅星期一係「六四事件」29周年，維園有十一萬五千名市民到場悼六四死傷者。事件造成嘅傷害，唔單止係人命，更多嘅，係之後帶出嘅社會分歧。

噚日朝早，一向對政治相當「敢言」嘅導演高志森，喺佢嘅個人FB上發表對六四事件嘅睇法，佢話：「沒有鄧小平先生當年的果斷平亂，就沒有今日中西的繁榮昌盛！這是八九六四最需要『平反』的一點。」言論一出，短短一日已經有接近三千人「Like」，更有網民留言表示雖然當年有份參與遊行，但現時回想就對傳媒報道嘅「真相」表示懷疑。

亦都有網民貼出八九年六四事件剛發生時，高志森導演出席一個活動時對六四嘅看法，片段中高志森導演表示：「原本我哋今日嚟係希望做一啲電影嘅宣傳，不過我覺得依家電影嘅宣傳可以唔使做住喇，因為今朝早北京當局係射殺、屠殺北京嘅市民同埋學生。我覺得依家唔係做電影宣傳嘅時候，我覺得應該係同全港市民一齊，站在一起、團結一致爭取香港將來嘅自由民主，同埋反對北京政府暴力鎮壓學生同市民，係要盡一啲力。」

貼出該片段嘅網民留言：「高先生，你唔好刪除你自己講過嘅嘢。」不過，留言最終已被刪除。

精選娛聞，喺晒《娛果》
http://fb.com/appledailyent