王晶執導嘅《賭城風雲2》，今日繼續喺曼谷開鏡，發哥（周潤發）、張家輝、余文樂、曾國祥、文凱玲、朱晨麗及內地小演員、4歲嘅Angela（王詩齡）都喺現場，今日拍攝爭執戲份，以及拍攝張家輝帶住戲中飾演佢個女嘅Angela嘅逃亡戲，而Angela繼續受歡迎，劉偉強攬住佢合照。

不過Angela始終係細路女，好快就覺得攰，仲要瞓晏覺，成場劇組兼巨星都要等佢瞓醒，先可以繼續拍呀！

王晶話今日有拔槍場景，現場又多人，所以場面有啲混亂，佢話呢度拍嘅係講述家輝利用計謀逃亡，仲會坐上泰國特色長尾艇，王晶又話，今次喺一條叫PhasiCharone河旁邊一間觀音廟拍，條河入面有好多大魚，當地人視為神魚，唔會捉佢哋：「你擲麵包落去，會有幾百條魚搶食，好壯觀。」

王晶再透露，之後會再去鱷魚潭，同一間全木造嘅神廟：「廟外面有幾百個用木雕出嚟嘅神像，原本都唔諗住去嗰度拍，不過去咗睇之後，唔拍唔得。」

家輝喺拍攝長尾艇追逐戲份時，因為始終係近水，又帶住Angela嘅替身，所以家輝都好緊張，全程攬實小朋友，佢話：「梗係要啦，啲艇都有速度0架！點都要照顧個細嘅。」

同發哥合作，飾演國際刑警嘅余文樂心情點呀？佢話：「都係工作，不過當然係期待啦！」佢又話同發哥有對手戲都唔緊張。

同係演刑警嘅曾國祥，就發生咗啲搞笑嘢，佢拍攝其中一幕拔槍戲嘅時候，地下係啲又爛又疏窿嘅木板，下面就係條河，又咁啱道具槍嘅子彈匣鬆開咗，個子彈一跌就跌咗落水，佢話：「搞到俾導演鬧，下次要小心啲。」

採訪：張俊銘
攝影：沈健程