返工要搭升降機，返屋企都要搭升降機，行商場就搭電梯，無論升降機，還是電梯，都已經成為我們生活不可缺少的部分，因此升降機及自動梯的維修保養很重要，加上香港高樓大廈林立，對於相關的維修及工程人員需求迫切。有志入行的人士，可以報讀坊間舉辦的升降機及自動梯的職專證書課程，學習升降機及自動梯的安裝、保養及檢測的技術，考取牌照成為電機業工程人員。

課程由卓越培訓發展中心（電機業）首席教導員Charles（黄啟漢）任教，Charles表示課程着重學員的技術訓練，助學員考獲牌照，與工作接軌，「課程教授學員認識升降機及自動梯嘅原理，包括電機理論、電動機及變壓器等，學習升降機及自動梯嘅安裝、保養及檢驗呢3大範疇；另外，學員仲需要上中、英、數等嘅通識科目。」

必做3個工序
課程設有電梯工場及3部升降機等設施，供學員進行模擬維修使用，增加實戰經驗。Charles說：「每部升降機每年總共有24次嘅保養，升降機公司製定咗每次保養嘅程序或零件，例如檢測鋼纜生銹及損耗，維修人員按既定嘅編排進行檢測及保養。此外，每次維修保養都會做3個工序，包括清潔、落油及調校，例如先清潔零件或外門污跡，然後喺郁動嘅零件上面落油，最後跟住法例嘅要求調校零件嘅位置及尺寸。」

着重安全意識
最近發生升降機維修事故，Charles表示課程着重學員的維修安全意識，「喺課堂上，我哋要求學員做好個人防護，上工藝堂時必需穿着工衣。如果學員要進入機箱或井道做模擬維修，就要佩戴安全帽、安全鞋及扣好安全帶等。導師仲會喺課堂上跟同學討論升降機及電梯事故，分析事故發生嘅原因，藉此警惕學員要做足安全程序及措施，提升佢哋嘅安全意識。」

職學計劃
升降機及自動梯電機業青黃不接，學員修讀一年課程後，第二年有公司到學校招聘學員當學徒。Charles說：「為咗鼓勵更多年輕人入行，我哋同政府及業界合辦職學計劃，為參加計劃嘅學員提供津貼及設有特定薪酬，除咗有做學徒嘅薪金外，仲會有多$1,400至$1,500嘅職學金津貼，因此學員喺學習專業知識及技術嘅同時，亦可獲取穩定收入。當學徒嘅薪金約有$11,000至$15,000。」當考取全能牌（安裝、保養、檢測）後，可成為合資格技工，到時人工約有$16,000至$20,000。

搵好工，即上 http://www.ecjobs.com.hk