韓國人氣樂團FT Island主音李洪基噚日飛抵台灣，今日就以創作者身份出席「STAY REAL LIFE #在場証明特展」活動，現時仲有亞洲天團五月天嘅主音阿信，兩位主音喺現場有傾有講，十分老友。

李洪基被問到最想回到人生邊段時間，佢就話想返去同公司再傾續約時，佢話：「當時應該更慎重思考對我哋有利嘅合約，唔係只靠義氣簽約。」事實上李洪基多次已喺網上或公開場合批評所屬嘅FNC老闆韓勝浩，今次即使到咗台灣，依舊冇改變佢敢言嘅作風，又自爆之前同老闆食飯飲酒，老闆都叫佢少講公司壞話，不過李洪基坦言：「如果公司再做唔好，我以後都係會繼續攻擊。」阿信就話佢噚日同李洪基食飯已經傾咗好多。

對於兩人會否有合作機會，李洪基話：「阿信哥如果邀約嘅話，隨傳隨到」，再自爆近日好得閒。阿信指李洪基好似貓：「外表睇起嚟好可愛，但好勁爆，爆發力很強。」