郎朗噚晚喺紅館舉行一場《郎朗LiveinHongKong》演奏會，請來李克勤同祖兒擔任嘉賓，期間祖兒發台瘟唱錯歌詞，尷尬得尷尬掩口傻笑，又自言好榮幸能夠擔任郎朗嘅嘉賓，郎朗指首次跟祖兒合作感到興奮，更感激克勤演出，因為自己首次喺紅館彈奏就係跟克勤合作，之後克勤再喺郎朗伴奏下獻唱《我不會唱歌》。

訪問時，祖兒對自己老貓燒鬚，佢就笑言近得克勤多嘅人，都會出現呢個情況——唱錯或忘記歌詞，祖兒話：「始終係有少少緊張，冇理由首歌唱咗咁多場，係冇可能發生嘅事(唱錯)，我只能夠歸咎個原因係我太尊重呢件事啦。」克勤大讚郎朗係一個好玩兼冇架子嘅人，十幾年前合作至今都冇變：「最好笑係我諗住自己喺長沙趕返嚟好遠，點知原來郎朗前一晚仲喺埃及。」

講番佢哋農曆年去美國巡迴會否帶埋家人去，克勤指自己會一家出發，而祖兒就話：「我未決定，唔急決定，其實一齊去有乜問題啫。」

跟住克勤就追問祖兒話：「我睇報道話佢（劉浩龍）幫你揑膝頭哥？」祖兒指冇，克勤再問反過來幫佢揑練有冇？祖兒無奈謂:「冇，冇任何身體接觸。」克勤爆笑話：「呢個係世界最大神話，係神交！」祖兒乘機踢爆克勤叫佢去美國登台時睇唔著衫嘅美人魚騷，當指男友劉浩龍可能好想去睇時，祖兒指男友冇話去。