利物浦前鋒羅拔圖法明奴雖然喺禮拜二晚場波梅開二度，幫利記喺主場大勝史雲斯5:0，不過紅軍領隊高路普賽後竟然話，佢唔在乎呢位巴西前鋒到底入咗幾多球！

對史雲斯嘅兩個入波，係羅拔圖法明奴今季第15同16個入波，已經比佢效力球隊以嚟最多嘅一季多四球，不過高路普就好坦白咁講：「球員入波我梗開心㗎，但我唔會講得出佢哋邊個入咗幾多球，我根本唔在乎，我無興趣知呢樣嘢。如果我哋踢出自己嘅足球，入波係好容易㗎啫，可能你哋班記者都入到波。唔得咩？OK！但我喺呢啲情況都會入到波囉，呢個係我哋要做到嘅嘢。」

高路普繼續講：「當羅拔圖法明奴被調離場嘅時候，係人都見到佢唔係好開心，但係嚟緊仲有好多比賽，人人都會有機會入波。沙迪奧文尼今場無踢，佢之後都會有士哥㗎。我一向都好欣賞羅拔圖法明奴嘅努力同埋表現，佢入兩球我當然開心，但我真係講唔出佢入過幾多球，因為我覺得球球波都有佢份，佢永遠都會為對方帶嚟麻煩。上半場佢由右閘到左閘都有幫手，埋單仲入到兩球，幾好吖！」

----------------
BFB CHAMPIONS 2.0 聖誕新年活動連環出擊，登入即送傳奇球星「林伯特」！ http://bit.ly/2xrTKGM