歐國盃比賽逐漸入肉，如果仲嫌唔夠刺激，無相干，隨時連分組賽都有「賭輪盤」遊戲畀大家睇。講嘅係假如A組捷克、土耳其禮拜日和波嘅話就即開創以互射12碼（PK戰）決定晉級命運嘅先河。係嘅話，我求大俠梗係睇好百發百中、兼有鋼門施治壓陣嘅捷克啦。
歐國盃不嬲多搞作，好似96年由比亞荷夫射入歷來首個大賽嘅「黃金入球」，而今屆亦改制，如果分組賽兩隊分數、得失球、得球都一樣嘅話，就唔會計咩系數或者抽籤，而採用球壇最殘酷嘅互射12碼方式決定邊隊出線。睇A組形勢，家吓葡萄牙已經出咗線，而捷、土兩軍同樣2戰得3分，入2球而失3球，如果下場和波，就即刻（加時都唔使）互射12碼分出勝負──到時一於擔定凳仔，睇邊個好似歐聯決賽嘅泰利或者安歷卡咁孭鑊囉。

暫與土耳其同分同得失球

土耳其前鋒卡森李察士就拍晒心口咁話，有信心贏波出線，就算要互射12碼都冇有怕喎：「如果真係要射，我哋教練都會做好部署，你知啦，呢樣嘢怕嘅話就輸硬！」係，施治啱啱喺歐聯決賽對曼聯射輸12碼，但正如頭先咁講，嗰場波車路士嘅敗家仔係泰利、安歷卡，唔關佢事；加埋呢個捷克門神今屆歐國盃兩場都保持高水準，假如我係操刀嘅土耳其球員，行上前對住佢都肯定「騰晒雞」，未射都輸咗一半啦。連C朗都射唔入佢，斷估班土耳其球員都冇好下場。
再講，當大家都認定德國係互射12碼「1哥」，查實捷克一啲都唔失禮，過去3次喺大賽同人互射12碼，全部贏晒不特止，仲要20球都中晒，命中率百份之一百，問你怕未？