今日會考放榜，敏妮已經遠離會考歲月一段日子，但每年見啲學生收到成績單，鼻紅紅、眼濕濕個樣，就會忍唔住鬧，早知今日何必當初。今時今日已經係知識型經濟，得中五學歷好難同人競爭，但各位「落第」嘅同學千祈唔好放棄，喺股票市場，有本錢嘅大戶要翻身，一定易過散戶，至於各位同學你哋嘅本錢咪就係青春囉！

理財顧問幫人設計投資組合嘅時候，一定會問幾個問題，包括你有乜目標？仲有幾耐先退休？諗住退休後過啲乜嘢生活？成績差強人意嘅同學，你哋一樣要問自己有乜目標？諗住用幾耐達到目標？日後想過啲乜嘢生活──有目標、設定時限就會有推動力。
噚日返工嗰陣，喺車度聽電台節目，聽到一個真人真事古仔，可借敏妮遲上車聽唔晒，只可以同大家分享一啲片段。話說有位女士以前喺廟街賣唱維生，後嚟冇唱，唔知因乜原因借咗一筆錢，為咗還債，做過好多行，包括去街市賣菜，後來被迫再披歌衫，主持人問佢：「你覺得最辛苦係幾時？」
「再落廟街賣唱嗰陣，因為要面對唔同嘅人，比喺街市賣菜仲難捱。」
主持人好感觸話：「𠵱家啲後生仔打工，一唔高興就唔撈，你係點捱過呢段日子？」
「為咗錢。只有賣唱可以搵到錢還債，當時我定咗兩年還清啲債嘅目標。最後賣唱嗰日真係好開心，點知第二日就病咗，個病可能一直都有，但顧住還債，冇發出嚟就冇留意。」𠵱家呢位女士還清債務，病亦已痊癒，仲組咗個歌藝團同啲非牟利機構合作搞慈善活動。

敏妮短期目標係有一層自己嘅樓，較長遠嘅目標就係退休之後靠積蓄同投資過活，唔使求人。所以𠵱家除咗發憤工作，仲成日請教股王A炒股心得，同埋趁股市進入調整期，讀定啲有關股票分析嘅書，等下一次大牛市來臨。
http://manlitalk.com/blogs/