適逢香港回歸20年，中國銀行又在港開業100年，最近喺中環總行中銀大廈舉行大型展覽，展出唔少珍藏寶物，就等華華同大家介紹其中3款。

首先，中銀香港係印鈔行之一，唔講唔知，1935年之前，都係滙豐獨家印1蚊紙，之後交由港府接手，委託英國印鈔廠印製。

不過，由於二戰期間交通嚴重受阻，搞到一疊疊1蚊紙喺英國嚴重delay，香港市民又等錢用，最後要徵用100萬張在香港印、內地用嘅中國銀行5圓鈔票，上面加番個「香港政府壹圓」印仔，咁就5蚊人仔當1蚊使嘞！展覽見到呢張，仲係香港史上首款加蓋鈔票㖭呀。

另外，國際著名建築師貝聿銘（貝老）一家同中銀一向好有淵源，佢自己係中銀大樓設計者，阿仔貝禮中負責復修舊中銀大樓，父親貝祖詒就曾經係中國銀行香港支行經理。今次展覽就包括貝祖詒當年用過嘅卡片同印章，印章仲印得㗎。

咁啱貝老今年4月慶祝100歲生日，中國銀行行長陳四清、中銀香港總裁岳毅早前飛去美國探佢，100歲嘅貝老仲喺中銀香港100周年年報上親筆簽名。

展覽由即日起免費開放，為期至少3個月，大家不妨行過參觀。

掌握財經生活資訊，即Like「蘋果ATM」fb專頁啦！
http://fb.com/appledailyatm