噚日個市跌得甘，強勢中資股固然要跌，但係跌幅反而唔及屢創52周新低嘅弱勢股，噚日有好幾隻曾是基金愛股嘅工業股，在屢創新低同時大幅下跌，有被基金洗倉之嫌。例如曾是股壇長毛DavidWebb聖誕推介嘅嘉利國際（1050），已連續出咗9支大陰燭，噚日跌多6.7%，過去一年股價唔見三分之一。
另一隻DavidWebb至愛新確科技（1063）突然宣布供股，繼復牌大跌41%之後，噚日再跌一成，跌到落0.43元，過去一年股價跌咗七成，除咗股壇長毛，凱萬基金同專業散戶陳錦添都要「領嘢」。另外精電（710）股價勁跌5.7%，過去6個交易日，股價跌咗接近1蚊，𠵱家呢個價，股息率超過10%，莫非連高息政策都救唔到股價？嘉利同精電仲有個共通點，就係同樣有惠理基金揸重貨。
不過又唔係所有工業股都咁差，例如名牌鐘錶生產商宜進利（304）、造鞋嘅永恩（210）分別創52周收市新高，尤其係前者，近排不斷有大行唱好，股價可以講係長升長有。最奇嘅一份報告，係摩通最近發表報告推介10隻國企股，宜進利竟然上榜，好似比較牽強。
噚日仲有兩隻電池股比亞廸（1211）同光宇（1043）分別創52周新高，不過比亞廸收市升幅就明顯收窄，似係受市況影響。內地電池股飛毛腿（1399）招股，呢兩隻股票受惠影子股概念，不過呢兩間公司股價升足1年，無理由1年前已經炒定影子概念啩？照咁推測，行業利好因素之下，飛毛腿上市後股價應該會好勁。
歐陽風