鄭少秋、江華及麥潔文同黎瑞恩等，噚晚到九展出席大名娛樂25周年晚宴，老闆林建名當然在場啦。秋官一臉疲態出席，原來佢啱啱喺加拿大登完台。講到乖女鄭欣宜身形翻脹，秋官話返嚟後暫時未同佢聯絡到，係咪掛住拍拖？秋官衝口而出： 「佢拍拖好開心，大家有whatsapp。」

哦，欣宜已告知爹哋有戀情？秋官即知衰封口： 「咪住，佢有冇認先？佢冇認我唔可以亂講。」

咁欣宜有冇帶新男友畀秋官過目？佢又唔覺意踢爆： 「今次冇，上次有，我話約食飯佢話唔得閒，掛住拍拖啩。」

另外無綫近日改善拍劇制度，秋官話當然係好事，原來佢當日拍《心戰》時已經改善咗唔少，有更多休息時間，佢覺得因為藝員唔喺最好狀態，對表現都有影響。會唔會再為無綫拍劇？秋官話：「冇搵呀，可以傾冇問題。」