呂健威馬房一跑快活谷就生猛，對上一次谷戰於9月23日憑「有智者」、「紫電明珠」及「軍歌」中三元，今晚再贏「有智者」、「軍歌」起孖，開季四次谷草，僅一次冇馬贏，其餘三戰共取六win，呂廐火速成為季內谷草首席馬房。
「有智者」贏完再戰五班，五歲馬開竅於低班大勝連捷唔奇，反而「軍歌」贏完三班轉二班，今次跑第七場二班1200米，贏馬姿態一樣輕鬆，韋達直路齋推冇開鞭，隻馬拉士百幾米自動波殺上，擋都擋唔住，1.8倍大熱門順利連捷於谷草1200米，同時捧走愛爾蘭錦標，表現好有新谷草短途霸主風範。
今場最唔好彩嗰隻馬係「天合」，潘頓留放一絕又冇走蝕位，直路捐內欄上諗住贏得，點知撞正「軍歌」大熟大勇，呢匹方廐高價自購馬始終開唔到齋只得第二，連贏僅7.8倍。第三名係前領馬「你知我心」，第四名叫「摯友無敵」，四重彩全場最熱四駒包辦，只派848元。