政府硬推國民教育嚇怕家長，唔係冇理由。YouTube近日瘋傳一條「2+2=5」嘅短片，教師喺教室黑板寫上2+2=5，有學生堅持真相等於4，結果被槍斃，其他學生惟有跟住老師讀歪理答案；就算知道答案係4，學生都只可以偷偷喺記事簿寫低。
好多家長睇完短片話好心寒，因為由教育局資助嘅國民教育教材，竟然話共產黨係進步無私，你話家長點會唔驚？
喺城市論壇一拍成名嘅國民小先鋒副主席余綺華，繼續俾人大起底。網民踼爆佢任教嗰間香港道教聯合會圓玄學院石圍角小學，唔少現任同前任教職員都同民建聯、工聯會同教聯等左派組織有千絲萬縷嘅關係，有網民形容比男女之情更錯綜複雜喎。