影視處、淫審處成日失驚無神嚇親人，搞到唔少民間團體好似驚弓之鳥咁，出版刊物前都自我審查。女同盟會近排得到衞生署資助，出咗本《女女安全性行為求生手冊》，向女同志宣傳安全性行為訊息。
佢哋製作認真，搵model影咗唔少介紹安全套、性玩具用法嘅靚相，女同盟會好識做，為免小冊子令政府尷尬，事前問過衞生署意見，署方唔想揹鑊，建議佢哋先畀淫審處審審。但女同盟會今次只得6,000蚊資助，送檢要畀2,000蚊，一睇就知唔化算，佢哋自動舉手投降，決定自行包膠袋同加警告字眼。女同盟會成員煒煒話，咁做本小冊子只可以派畀18歲以上人士，但係女仔合法性交年齡係16歲，擔心後生女接觸唔到呢啲重要訊息。