每逢初春，禮賓府都會開放畀公眾參觀賞杜鵑。噚日係狼英上場後首個禮賓府開放日，佢成日話自己好鍾意搞吓農務，唔少人都諗住入去睇吓佢啲菜種成點，或者佢點處置上任特首曾蔭權心愛嘅錦鯉池，可惜兩個景點都係遊人止步，小市民只能遠觀。
狼英入主禮賓府後，外牆粉飾過，部份屋頂瓦片重鋪過。唔少參觀嘅市民都要求狼英唔好淨係口講穩中求變，開放多啲地方畀人參觀，例如辦公室、一樓樓層等，唔好次次入去都只係好似去睇花卉展咁。

警察守住塊田

大批市民噚日一早就排隊入禮賓府參觀，入到去見到掛有特區區徽嘅狼英座駕，個個起勢咁影，之後見到一片俾綠色網圍住嘅小農地，想埋去睇吓？唔得喎，腳下有個「遊人止步」牌，仲有個警察守住塊田，市民只可遠觀，隱約睇到種咗啲菜心、生菜，菜心開咗花，要食㗎啦！煲呔個錦鯉池呢？唔好意思，都係「遊人止步」，入面仲有池水，但因為有欄柵擋住，八方伸長條頸都望唔到有魚游緊。禮賓府除咗外牆、屋頂睇到明顯翻新過之外，其他唔覺有乜大變，因為室內範圍，一如以往只開放咗地下會客室、飯廳等，樓上依然冇得參觀，字畫擺設就有莊子逍遙遊等。
次次禮賓府開放日都嚟嘅市民陳先生話，今年杜鵑開得多咗，但睇嘅嘢同以往差唔多，「開埋一樓就好喇」。喺貴州嚟嘅李小姐都覺得有啲失望，因為官邸辦公地方睇唔到，地下只得幾個室參觀，仲要隔住玻璃睇。

mailto:[email protected]