噚晚夏蕙B扮成「四大美人」....即係加咗3個頭喺自己身上,落老蘭出巡,引來市民圍觀,而填詞人梁柏堅,同樣落咗老蘭,咁樣就俾佢遇上「女神」夏蕙B喇,仲唔拿拿臨影返張相合照放上網咩!
佢噚晚喺微博晒同夏蕙B嘅合照話:「銅鑼灣偶遇!你想不想吻一吻?夏蕙若果莊重高雅,如何跪拜她?天姿國色,不可一世,天生我高貴艷麗到底!收我做你的迷。」拎黃偉文嘅《芳華絕代》嚟玩,Wyman當然要搭下嘴:「真係威!要吻四遍,四個頭都吻遍(至少)」仲整個偷笑樣。
其實噚日夏蕙B未出街,梁柏堅已經好留意佢嘅造型:「各位準備出街嘅朋友,已經輸了!其實我好奇的是:為什麼其餘3個是宫雪花?」Wyman又搭嘴話:「有時我真心覺得她是位出色的行為藝術家。有了夏蕙姨,whoneeds草間彌生?祝你萬聖節快樂!」連伍詠薇都話「無得輸」。
另外,Wyman前日同老友徐濠縈去上海出席活動,自嘲可能俾人當成司機,所以落冇人幫佢擔遮,佢話:「前夜大雨的上海,到達秀場時我們四個人下車,現場剛巧只有三位撐傘的護衛員,結果除了我之外的三位都被接走了(包括我經理人和幕後朋友),而我要冒雨走了幾十米...之後想想,大概他們以為我這造型真的是司機吧!請問,這算成功還是失敗?」