【行程好飄忽】中秋節陪屋企人?甄子丹:唔好成日問我行蹤
甄子丹中秋節
甄子丹今日去到機場禁區內,為新開幕嘅貴賓室擔任特別嘉賓,子丹話貴賓室對藝人嚟講係一件好事:「始終有個地方畀我哋食嘢沖涼,以前都會經常遇到遲到或者航班delay,好彩o依家我哋嘅宣傳團隊,所有嘢都安排得好好,呢啲問題已經好少遇上。」
講到佢主演嘅新戲《追龍》日前首映,問到子丹知唔知道電影反應如何?佢話:「聽到個反應好好,證明我哋嘅努力係畀人睇到,而且國內國外都有好多人俾like我哋。」嚟緊中秋節,有冇時間可以陪屋企人?佢話:「你哋唔好成日問我行蹤,我行程好飄忽㗎嘛,其實呢我太太同外父o依家就喺外地。」
佢又透露近來拍緊一套同大班年青演員合作嘅新戲,佢話:「係教育勵志嘅題材,同一班年青人合作,佢哋好有heart,我自己除咗做幕前之外仲做埋監製,電影已經拍咗一個月。」子丹仲透露嗰班年青人入面有一、兩個已經畀佢簽咗,佢大讚對方係好有潛力嘅小鮮肉。
講到話中秋會唔會陪屋企人?子丹話叫大家唔好成日問佢行蹤!