前日個市升成千點,唔少股民賺到笑,華華噚日都節錄咗啲散戶網友「晒命」語錄同大家分享,個個唔係話食黑松露菌,就話阿一鮑魚,網友高級新手仲話要打包條蘇眉餵貓。不過,噚日個市嚟個倒轉大「DeepV」,「晒命」網友即刻變鵪鶉,仲慌死輸錢輸到冇飯開。
Choychai話:「嗱嗱聲劏咗隻貓,拎返條魚出嚟食喇!」拜仁同baal6868就分別叫大家食廿蚊三餸飯,同埋去大家樂食一人一鍋。Jeff30叫大家唔使驚,事關大家一定有得食……驚風散。
其實有錢食魚翅,冇錢咪好似膠波仔話齋:「趣趣哋,食住碗仔翅先。」kalvin914話:「至多食鮑魚……菇,同埋粉絲當魚翅。」
當然,又唔係所有人都咁悲觀,好似皇帝出巡就話:「前日食飽咗,噚日keepfit唔食住,今晚再食過魚翅鮑魚。」mmxmmxmm就話:「啲股平咗,即係有更多水位賺,所以繼續食鮑翅。」
都係BBQ490嘅散戶投資健康心得,華華認為最啱聽,佢話:「股票賺錢時應該食白粥警惕自己;股票蝕錢時應該食魚翅安慰自己。」