薛家燕、蘇珊等人噚晚喺尖沙嘴文化中心，為油尖旺回歸文藝晚會表演。日前馮素波搞咗個演唱會，「七公主」裡面，有三公主去捧場，之後就有人話:「不如搞個七公主演唱會啦！」

噚晚家燕姐被問到係咪搞七公主演唱會，佢話：「係有人問我會唔會搞七公主演唱會，主辦商叫我聯絡其他六公主，不過搵齊人真係有啲難度，仲要芳芳耳仔有問題，可能部份收益捐護苗基金，會比較易請到佢。七公主個騷好值得做，大家都成長唔少，希望可以傾得成，畀多啲時間佢搞，希望明年可以做得成。不過自己演唱會未諗好，仲要搞七公主。」言下之意即係？

蘇珊同小恩子係朋友，佢講起小恩子發現胰臟長良性瘤，但唔可以開刀切除，但亦因為呢個病，令佢同前夫曾智明言和故新(新聞連結: http://bit.ly/1KlI782 )。蘇珊噚晚話：「好欣賞小恩子唱歌好聽，人仲好堅強，大家知佢屋企有狀況，佢好好，唔會多口同其他人講，無怨言。」又話小恩子好少同朋友訴苦，亦唔鍾意刻意打畀人、麻煩其他人。

不過小恩子患病一事，佢哋身邊好朋友係知道嘅，蘇珊話：「佢用積極樂觀態度面對。好多事好難預料到，但係就會幫小恩子祈禱，知佢會勇敢會對，佢一定會OK。」另外，JoeJunior噚日69歲生日，佢話之後會同粉絲慶祝。